DAĞLAR
(Dağlara xitabən üçüncü şeir)

Tarix səhnəsində yetişdi zaman,
Başlanmış bu çağın mübarək, dağlar!
Hələ nə zəfərlər gözləyir bizi,
Qutlanmış novrağın mübarək, dağlar!

Dövranın gərdişi döndü, dəyişdi,
Davadan doğulan ərlər yetişdi,
Didilmiş yaralar tutdu, bitişdi,
Üç rəngli duvağın mübarək, dağlar!

Nə vaxtdır yol-iriz bağlı qalmışdı,
Qoynunda yağılar məskən salmışdı,
Canımı sağalmaz bir dərd almışdı,
Sayalı qonağın mübarək, dağlar!

Xətai qırmadı könül bağını,
Nadir unutmadı hicran dağını,
İlhamın silahı əzdi yağını,
Dəmirdən yumruğun mübarək, dağlar!

Qurtuldu yağıdan zənburun, balın,
Bir başqa görünür yamacın, yalın,
Zirvəndən boylanır şanlı hilalın,
Müqəddəs sancağın mübarək, dağlar!

Haqqa nisbət tutub ulu Ələsgər,
Andırıb, tanıdıb, bilib pərisgar,
Hər səngər məbəddi, pirdi hər əsgər,
Şuşa tək ocağın mübarək, dağlar!

Ay Ustac, min şükür arzuna yetdin,
“Dədə”n gedən yolu, sən də qət etdin,
Dolandın dünyanı yurdunda bitdin,
Doqquzu zər tuğun mübarək, dağlar!

Zaur Ustac

Gəlmişəm Vətən

Vətən, aç qolunu qarşıla məni
Günahkar balanam qonaq gəlmişəm.
Dözüb bu həyatın haqsızlığına
Keçib neçə-neçə sınaq gəlmişəm.

Cahillik elədim gəzdim,dolandım,
Hər süni bəzəyi bir cənnət sandım.
Bağışla gec oldu sonunda qandım
Yığmışam boynuma qınaq,gəlmişəm.

Sənin tikanına daşına qurban,
Dağlardan süzülən yaşına qurban,
Yaralı bağrının başına qurban
Salmışam hər yana soraq,gəlmişəm.

Tən olmaz hər dağla,hər daşla Vətən
Ayrılmaz nə gözlə ,nə qaşla Vətən
Bu şair balanı bağışla Vətən
Götürüb bir qələm,varaq,gəlmişəm.

Nofəl Ümid

VƏTƏN Torpağında xış səsinəm, Könlündə alqış səsinəm. Sabaha çağırış səsinəm, Dilində nəğmənəm vətən. Susmayan sədanam sənin, Arzuların, diləklərin... Bağında gülün-- çiçəyin, Çölünəm, çəmənəm, vətən Əzəldən sənə vurğunam, Ən sədaqətli oğlunam. Nə bezginəm, nə yorğunam, Mən elə həmənəm, vətən.

Mayıl
Məmmədli

ÜMMANSAN AZƏRBAYCAN Sən nəhənglər sırasında, Əsrlərin qovğasında Zaman--zaman çalxalanan Bir ümmansan, Azərbaycan. Varlığını yaşatmaqçün, Qanlı savaş meydanında Çarpışaraq, vuruşaraq Heç vaxt susub səngiməyən Bir üsyansan, Azərbaycan. Bu mübariz inadınla Milyon--milyon ürəklərdə Əbədi bir yurd salmısan. Tarixinə kəc baxanın Gözlərini qarsalayan od olmusan. Sən günəştək işıq saçan Bir məsləkdən doğulmusan. Səsin haqqın öz səsidir, Kim deyir ki, öz içində boğulmusan. Əminəm ki, varlığına Uzanan məkrli əl kəsiləcək. Uğrunda canından keçən Neçə şəhid cücərəcək, Ucalacaq, boy verəcək. Mənim sənə oğul borcum--- Sərhəddini qorumaqdır hünərimlə. Daha aydın sabahlara mayak olub, Yol açmaqdır zəfərimlə.